“Chithi ~ ଚିଠି ~ ” Odia Prema bhara Kabita ra Lekhika Julee Behera
…….ଚିଠି……
ଏଇ, ଦେଖନା
ତୁମ ଭାବନା ରେ
ଆଜି ପୁଣି ଭୁଲିଗଲି ମୁଁ
ତରକାରୀ ରେ ଲୁଣ
ସମସ୍ତେ ଛି ଛି କରୁଥିବା ବେଳେ
କେଜାଣି ମତେ କାହିଁକି ଲାଗୁଥିଲା
ଭାରି ସୁଆଦିଆ, ଠିକ ତମ ଦୁଷ୍ଟାମି ପରି
ତମ ସହ କଣ କେବେ ଏମିତି ହେଇଛି?
ମୋ ଭାବନା ଭିତରେ ଭିତରେ
କେବେ କଣ ଭୁଲିଛ ନିଜ କୁ?
ମୁଁ କିନ୍ତୁ ଭୁଲିଛି ଅନେକଥର
ଭୁଲିଛି ରାତିର ନିଦ
ଭୁଲିଛି ପେଟ ର ଭୋକ
ବାକି ଅଛି ଖାଲି ଯାହା ଓଠ ତଳ ର ଶୋଷ
ଜାଣେନା କାହିଁକି ନିରୋଳା ନିରୋଳା ସଞ୍ଜ ଟା ରେ
ତମେ ମନେପଡ ଆହୁରି ପ୍ରଚୁର
ଲାଗେ ଯେମିତି ଏଇ ତୁମେ ପାଖରେ
ଲୁଚି ଲୁଚି ଦେଖୁଛ ମତେ ପରଦା ଆଢୁଆଳରେ
ଏଇ ଯେମିତି ସଞ୍ଜ ବତୀ ଦେଉ ଦେଉ ଟାଣି ଧରୁଛ ମୋ କାନି କୁ
ଏଇ ଯେମତି ଆଙ୍କି ଦେଉଛ
ପ୍ରେମ ର ମିଠା ଛୁଆଁ ଟେ ମୋ ଓଠ ପାଖୁଡା ରେ
ଆଉ ମୁଁ ମରିଯାଉଛି ଲାଜ ରେ ଲାଜ ରେ
ତୁମ ରି ବାହୁରେ
କି ଶାନ୍ତି ପାଅ କେଜାଣି ମତେ
ଏମିତି ହନ୍ତସନ୍ତ କରି ?
ଆସିବ ବୋଲି ତ କହିଥିଲ ଫଗୁଣ ରେ
ହେଲେ ଫିକା ଫିକା ରଙ୍ଗ ନେଇ
ଆସିଥିବା ଫଗୁଣ ଟା
ଚାଲିଗଲାଣି କେବେଠୁ ତୁମ ବାଟ ଚାହିଁ ଚାହିଁ
ଏବେ ଏଇ ଗ୍ରୀଷ୍ମ ଟା ର ତାତି ବି ତ ପ୍ରଖର
ଛଟପଟ କରି ଜଳାଇ ମାରୁଛି
ଠିକ ତମ ବୀରହ ପରି
ଏବେ ତ ଫେରିଆସ…..
ଫେରିଆସ ନା….. ଶ୍ରାବଣ କୁ ଛାତି ରେ ଜାବୁଡି
ଭିଜି ଯାଉ ମନ ଟା ମୋ ଆଉଥରେ
ତୁମ ପ୍ରେମ ର ମିଠା ବର୍ଷା ରେ
ତୁମ ପ୍ରେମ ର ମିଠା ବର୍ଷା ରେ …………
|
Get free daily email updates! |
Follow us! 
|
0 comments:
Post a Comment